陳茂波維園行年宵被社民連狙擊 最後棄座駕 搭港鐵敗走

 2019-02-01     港聞

維園年宵嘅氣氛越嚟越熾熱,今日輪到經民聯嘅檔位開幕。財政司司長陳茂波畀面出席主禮,落得年宵市場就預咗要被人狙擊。同樣有喺維園擺檔嘅社民連,上前要求陳茂波食咗個「萬億元」嘅cushion。淨係識攞市民嘅血汗錢搞人工島嘅陳茂波,唔肯就範,為咗避開社民連狙擊,寧願放棄座駕,急急腳搭地鐵走人。佢就有得揀唔買「萬億元」cushion,但香港人就要硬食政府嘅萬億元東大嶼。

陳茂波替經民聯年宵攤檔主禮時自嘲,話入場時見到好多豬,包括佢近排成日見嘅「嬲嬲豬」。梗係啦,政府派錢派到天怒人怨,搞出大混亂,港人唔嬲豬就假。

開完幕,波波沿路行去天后途中,經過鄧鏡波書院、張祝珊英文中學、西區少年警訊等4個年宵檔嗰陣都有幫襯,買咗啲豬公仔、斜孭袋同埋一個福袋,過程中有市民向佢「派嬲」,最激梗係社民連啦。

當佢臨到天后嘅時候,社民連成員狙擊波波,要佢「食」咗個萬億元cushion。雖然請願人士都埋唔到波波身,但成功阻止咗波波上佢嘅紅色座駕,以免自己「倒錢落海」,最後波波要自行坐地鐵由天后返金鐘。

財政司司長辦公室發言人事後回覆話,波叔今日喺維園花市用咗大約750蚊辦年貨,當中包括3隻豬公仔。發言人又話波叔離場個陣遇上被社民連成員阻擋座駕,因為覺得「無謂行過去,以免產生混亂和危險」,加上正值放lunch,所以決定改坐港鐵去中環,仲話波叔平時都會坐港鐵喎。